من فترة زمنية طويلة ..كان فى بنت نزلت صورتها عالفيس بوك وهى مضروبة فى وشها وعنيها وارمة جدا وبتقول ان اخوها ضربها عشان خلعت الحجاب، وناس كتير جدا عالسوشيال ميديا تعاطفت معاها وايدوها،وانا شخصيا اتأثرت لما شوفت منظرها وقولت جوا نفسى:"هى غلطت لما قلعت الحجاب بس مكانش ينفع اخوها يضربها كدة ، وكان المفروض يتناقش معاها ويقنعها تلبس الحجاب بالهداوة ولا إكراه فى الدين و هوبا وبلا بلا بلا بلا

"...بس بعدها بفترة ،تخيلت انى مكان الاخ.

وتخيلت انى لقيت اختى فى يوم من الايام اتغيرت افكارها ومعتقداتها وقررت تقلع الحجاب...وتخيلت رد فعلى تجاهها هيكون شكله عامل ازاى؟؟؟ ..لقيت انى تقريبا مش هخلى حتة فى وشها سليمة،وانى هجرجرها من شعرها زى فيلم الارض، وهحبسها فى اوضتها ،وهعذبها تعذيب حقيقى وممكن من عصبيتى فى الموقف دا اضربها قلم يكسرلها فكها وتقريبا مش هيكون فيها حيل تمسك الموبايل تصور نفسها وتنزل صورتها عالفيس .

وهبقى مقتنع ان اللى عملته فيها صح ومن صميم الدين ومش هحس بالذنب (رغم افتقارى للأدلة والنصوص الدينية اللى بتدينى الحق فى ضرب اختى لما تقلع الحجاب ، وياترى لو هضربها هضربها ازاى ؟ وباى مقدار؟؟كل دا معنديش ادلة عليه) ورغم كدة انا مقتنع ان اللى هعمله من صميم الإسلام.....بعدها بفترة سألت نفسى ياترى لو اختى تركت الصلاة مثلا هتعامل معاها ازاى؟؟.......

لقيت ان اشطة جدا وعادى وهناقشها بالعقل والهداوة واشجعها عالصلاة واحدة واحدة واحببها فيها ويوغتى بطة بتصلى ولا اكراه فى الدين والحياة حلوة.

مع ان ترك الصلاة ذنب كبير اوى واكبر من خلع الحجاب كمان ،ترك الصلاة ممكن يكون مخرج من الملة اساسا، ولكن انا مقتنع ان الدعوة والحوار من صميم الدين بردو زى ما انا مقتنع ان عقاب اختى بالضرب المبرح من صميم الدين...

خد المفاجأة اللى جاية دى بقى، شيوخ وعلماء الازهر وكبار القراء اللى احنا كلنا بنتأثر بيهم ،نسبة كبيرة منهم زوجاتهم وبناتهم مكانوش محجبات اصلا فى فترة (الستينات والسبعينات )! وممكن تلاقى واحدة منهم لابسة جيبة مبينة جزء من رجلها عادى مفيش مشاكل..والمجتمع كله كان زيهم تقريبا فى الفترة دى والستات المحترمة كلها مكانتش بتلبس الحجاب غالبا وكانت الناس بتتقبلهم عادى وبيفضلوا اخوات فاضلات بردو ، وكل دا رغم الادلة القوية والنصوص الدينية فى الكتاب والسنة اللى بتفرض الحجاب على كل المسلمين واللى اكيد اى عيل صغير بيدرس فى الازهر عارفها وحافظها.....انا مش كاتب البوست دا عشان اناقش الحجاب او اشكك فى فرضيته ! انا مؤمن ان الحجاب فرض ..ولكن انا بستغرب من نفسى ، ومن المجتمع اللى انا عايش فيه! نفسى اعرف ايه هى المعايير اللى بتتحكم فينا وفى قناعتنا وفى مواقفنا ؟؟؟؟؟ نفسى اعرف ايه هى المبادئ اللى بتحكمنا ؟ هل احنا مسلمين فعلا ؟؟؟ هل احنا بنطبق اوامر ربنا زى ما احنا فاكرين؟؟ ولا بنطبق ثقافتنا وثقافة المجتمع اللى احنا اتولدنا فيه؟؟؟ وبعدها ندعى ان ثقافتنا وعادتنا وتقاليدنا تساوى الدين؟؟ هل الدين حكم على اهوائنا ؟؟ ولا احنا بنعمل دين يتوافق مع اهوائنا وطباعنا وشخصياتنا ؟؟؟؟ هل تفسيراتنا لنصوص القرءان والسنة بتعبر فعلا عن القرءان والسنة ولا بتعبر عن شخصياتنا؟ ...ازاى انا مبقبلش ان اختى تقلع الحجاب ومقبلش ارتبط ببنت مش محجبة او لبسها وحش بس فى نفس الوقت مبقدرش احتقر البنت اللى سايبة شعرها وبحترمها ومش بتهمها بأى سوء؟ وعمرى ما حكمت على بنت من خلال لبسها ! وبزعل لما اشوف ولد بيتكلم عنها وحش لمجرد ان لبسها ملفت وبحس انه متخلف او غبى ...طب ازاى انا بلوم على دولة الاسلام فى العراق والشام تعاملهم القاسى مع الستات فى الشارع وفرضهم الحجاب على كل المسلمات وشايف ان دا تشدد واكراه فى الدين رغم انى مقبلش ان شعرة من راس اختى تطلع برا الطرحة ؟؟ انا و داعش واحد بس الفرق ان انا بغير على اهلى ، وداعش بتغير على المسلمات كلهم! ...الخلاصة اللى عايز اوصلها من البوست دا ان لازم نتجرد من كل افكارنا وموروثاتنا الثقافية اللى بقت متغلغلة فى جهازنا العصبى وبتتحكم فى كل قرارتنا من غير ما نحس، لازم نبقى صافيين لله عشان نعرف هو عايز مننا ايه ونطبقه ازاى.